ЧҮС ХУУ ХАНДЫРТЫНГАН

Апрель 27-иң дүнезинде Кемерово хоорайга септеттинген кылымал арга-биле өкпени агаарладыр (ИВЛ) аппараттарны республиканың халдавырлыг аарыглар госпиталынче (чаа терапия корпус) эккелгенин ТР-ниң кадык камгалал сайыдының оралакчызы Адыгжы Монгуш @tmgnews17-ге дыңнаткан.

Тываның Баштыңы биле Кемерово облазының губернаторунуң аразында дугуржулга езугаар аппараттарны кыска үе дургузунда чаартып септээн. ИВЛ аппараттардан аңгыда, 1000 камгалал дериин (СИЗ) база эккелген. Ниитизи-биле халдавырлыг аарыглар госпиталында 58 ИВЛ аппарады бар.

Ол ышкаш Кемероводан кислородка кожар 100 системаны база эккелген. Республиканың № 1 эмнелгезиниң улуг эмчизи Вячеслав Ховалыг ону көргүзүп тайылбырлаан. Төп кислород станциязындан кээп турар кислородка кошкан клапаннар дамчыштыр 100 системаны эккээрге, ол-ла дораан реанимация палаталарында тургускан. Бир палатада-ла кислородтуң өл-шыгын өйлээр 3 херекселди кошкан. Бо хүнде эмнелгелер камгалал дерии-биле 100 хуу хандыртынган дээрзин Вячеслав Товарищтаевич дыңнаткан.

Тываның Кадык камгалал яамызы биле Росхимкамгалал бүдүрүлгези 32 муң камгалал дерии-биле республиканың эмнелгелерин хандырар дугайында керээни чарган. Дугуржулга езугаар Кемерово хоорайдан хөй катап ажыглаар 1муң камгалал костюмну, Ижевск хоорайда “Садолит” фирманың 5 муң костюмун, Новосибирскиден инфекционист эмчилерге 10 муң костюмну садып алган. Ооң бирги партиязы бо дүне келгени бо. Эмнелге албан черлери боттары база садыглажыышкыннарны чорудуп турар дээрзин Кадык камгалал яамызы дыңнадып турар.