Дайынчыларга Чаа чылдың белээ – манчы, боорзак

Чаа чыл уткуштур бистиң эрес-дидим дайынчыларывыстың фронтучу сеткил-хөөнүн көдүрер сорулга-биле чыгдынган белектерни декабрь 18-те Кызылдан чорудар.

Улуг-Хем кожууннуң Эйлиг-Хем сумузунуң хоочуннар, херээженнер, аныяктар чөвүлелдериниң кежигүннери Чаа чыл байырлалын уткуштур Украинада тускай шериг операциязында киржип турар оолдарга манчы, боорзакты белеткеп кылганнар.

Бо буянныг үүледе Эйлиг-Хемниң авалары – ырак-чоокта чурттап чоруур кыс чону идепкейлии-биле демнежип, акшаны чыггаш, манчы, боорзак кылыр аъш-чемни сатканын сумунуң херээженнер чөвүлелиниң даргазы Рада Быштак-оол дыңнаткан.

Кызыл хоорайның Кочетов кудумчузунда 155 дугаарлыг бажыңда республиканың каттышкан штавында “Дайынчыларга Чаа чылдың белектерин” декабрь 18-ке чедир чыыр.