Тывадан эр кижилер аразында бир дугаар болгаш амдыызында чаңгыс ФИДЕ шыдыраа федерациязының мастери, элээдилер аразында Европаның 2021 чылда чемпиону, Россияның 2023 чылда чемпиону Тамерлан Чындыгыр Тес-Хем кожуунда «Сайлык» уруглар лагеринге аалдап четкенин кожууннуң чагырга даргазының хүлээлгезин күүседип турар Олег Чангы-Оол дыңнакан.
– Тамерлан – кожуунувустуң хөгжүлдезинге улуг үлүг-хуузун киирген шылгараңгай күрүне ажылдакчызы Николай Васильевич Чындыгырның уйнуу.
Юбилейлиг чылывыста билдингир элээди шыдыраачывысты чаладывыс. Ол каас-чараш бойдус чурумалдыг черде дыштанып турар үежилеринге мастер-классты эрттирди. Оолдар болгаш уруглар арыг агаарга чемпион-биле шыдыраага күжүн шенежип, чоок таныжып алыр аргалыг болдулар.
Тамерлан бо күзүн Испанияга болуп эртер делегей чемпионадынга киржир. Элээди шыдыраачывыска болгаш ооң тренер башкызы Сергей Ыймыжаповичиге аңаа чедиишкинниг киржирин күзедивис. Тамерлан – бистиң идегеливис болгаш чоргааралывыс!
