Хензиг-даа арага амзапкаш, кажанда-даа руль артынга олурбаңар

Статистиктиг сан-чурагайдан көөрге, орук озал-ондактарының ниити санының 7,5 хуузу эзирик чолаачыларның хайы-биле бооп турар. Эзирик машина мунганы дээш кеземче элээн шыңгыыраза-даа, ол көргүзүг өскерилге чок арткан. Ооң хайындан, муң ажыг кижи амы-тынындан чарылган, оон-даа хөй кижилер бертик-межел артып, инвалид апарган.

“Эзирик” болуушкуннар колдуунда-ла дыштаныр хүннерде болурун статистика көргүскен. Ылаңгыя чайгы үеде, дыка хөй кижилер хөлдээр дээш, аңаа баргаш арага ишкеш, эзирик руль артынга олуруптары чажыт эвес. Ындыг чорук чүгле кемдээшкин-биле эвес, а чамдыкта өлүм-чидим-биле төнери харааданчыг.

Эзирик чолаачының кичээнгейи кошкап, реакциязы суларай бээр. Чырык удур көөрү баксыраар. Ырак база чоок хемчээлди шын тодарадып шыдавас, кызыл чырыкты эскербес, айыыл тургустунуп келгенин медеревес апаар. Ол ышкаш кыдыындан көөрү кошкап каар. Харын-даа кандыг-бир чүүлдү көрбес ийикпе, дораан удур хөделип шыдавас.

Эзирик чолаачының чамдыкта “эрези хайнып”, бодун өрү тогдунуптары – бо-ла орук озал-ондаанга эккээр. Чадаг кижилерни, чадаг-тергелиг улусту, кыдыында чоруур транспортту бо-ла эскербейн барган болур.

Улуг эзирик чолаачы будунга туруп-даа, шимчээшкиннерин чагырып-даа шыдавас. Орук-транспорт шимчээшкининиң өске киржикчилеринге айыылдыг апарып, болуп турар чүүлдерни билбес. Шак ындыг элең-дендиң эзирии автомобильди башкарып шыдавас болдурар. Чолаачы газ биле тормоз базар черлерин чазып, орук шимчээшкининиң чурумнарын үреп болур.

Эзирик чолаачы бодунга-даа, орук шимчээшкининиң киржикчилеринге-даа улуг айыылды тургузуп, озал-ондакка чедирип болурун утпаңар. Хензиг-даа арага амзапкаш, кажанда-даа руль артынга олурбаңар.

Тываның Кадык камгалал яамызы дамды-даа арага амзааш, машина шуут мунмазын база сагындырып турар.