Көдээ черлерни хөгжүдер программаның ачызында

Эрзин кожуун чагырга чери “Көдээ черлерниң комплекстиг хөгжүлдези” күрүне программазын боттандырар сорулга-биле ийи аңгы уруглар садтарында тудуг болгаш септелге ажылдарын чорудуп турарын дыңнаткан.

Нарын суурда школа назыны четпээн уругларның өзүлдезинге, кижизидилгезинге база кадыкшылынга улуг ужур-дузалыг «Хүннээрек» уруглар садының оран-савазын улгаттырары-биле тудуг ажылы кидин чоруп турар. Тудуг доостурга, чаш ажы-төлге 30 чаа олут ажыттынар.

Булуң-Бажы суурда «Челээш» уруглар садында үндезин септелге ажылдары доостур чадазында. Септелге болгаш тудуг ажылдары чаартынган төлевилел езугаар чоруп, чаштарга таарыштыр чаагайжыдылгалыг кылдынып, бүгү ажылдың шынарын тускай комиссия хыналдага ап турар.

“Көдээ черлерниң комплекстиг хөгжүлдези” күрүне программазын Чурттуң Президентизиниң даалгазы езугаар ажылдап кылган болгаш амыдыралда боттандырып турар.