Тывага частың болгаш күш-ажылдың байырлалынга тураскааткан чыскаалдарга үш муң ажыг кижи киришкен. Чамдык кожууннар байырлыг часкаал-биле кызыгаарлаттынмайн, күш-ажылчы мөөрейлерни база эрттирген.
Таңды кожууннуң төвү Бай-Хаак сумузунга, Май бирниң байырлалында, күш-ажылчы коллективтер аразынга чиңге манза кажаалар кылыр мөөрейни эрттирген. Ук күш-ажылчы хемчегни, коронавирус хамчыының мурнунда-ла, кожууннуң чагырга чериниң эгелекчи саналы-биле чарлаан турган.
Чаңчылчаан күш-ажылчы мөөрей кожууннуң чаагайжыдылгазынга улуг ажык-дузалыг. Командаларның кылган чиңге манза кажаалары, удавас тургустунар, уругларның ойнаар шөлчүгештерин каастаар.
Таңды кожууннуң чагырга чериниң даргазы Алик Монгуштуң дыңнатканы-биле алырга, бо чылгы мөөрейге сес команда киришкен. Ол күш-ажылчы коллективтер шупту кончуг эки ажылдаан болгаш оларның аразында аштырган командалар чогун онзалап демдеглеп.
Мөөрейниң эң чалыы киржикчизи – Чимит Сарыглар. Ол улуг улустан дудак чокка шеверин болгаш ажылгырын көргүскен. Ук хемчег аныяк-өскенни күш-ажылга кижизидер салдарлыы моон-на көскү.
Ол-ла хүн “Баян-Кол” муниципалдыг унитарлыг бүдүрүлгези Кызыл кожууннуң Кызыл-Чыраа деп черге теве кыргылдазын эрттирген. Баян-Кол сумузунуң күш-ажылчы коллективтериниң кашпагай кыргыкчылары чидиг хачыларын эптии-биле туткаш, тевелерни кыргааннар.