Кол шаңнал – телевизорну Ак-Довурак алган

Бөгүн “Тывамедиагрупп” парлалга бажыңының реклама килдизиниң “Чагыдылга дээш – телевизор” деп ойнаашкынының кол шаңналын Ак-Довурак хоорайдан Дадар-оол Монгуш алганын @tmgnews17 дыңнадып тур.

Эрткен чылын реклама килдизи сентябрь 9-тан декабрь 9-ка чедир “Шын” болгаш “Тувинская правда” солуннарга бо чылдың чагыдылгазын организастаан. “Почта России” АН-ниң сайтызынга онлайн чагыдылгадан аңгыда, реклама килдизиниң ажылдакчылары Чөөн-Хемчик, Бай-Тайга, Барыын-Хемчик, Өвүр, Сүт-Хөл кожууннарга четкеш, “Чагыдып алыкчының хүнүн” организастаан.
Ниитизи-биле республикадан 235 хамааты “Шын” болгаш “Тувинская правда” солуннарга чагыдылганы кылган. Бөгүн “Тува24” телеканалдың инстаграмда арынынга “дорт эфирге” ойнаашкынны чоруткан.

Ойнаашкынның эң кол шаңналы – улуг өңнүг телевизорну Ак-Довурак хоорайдан Дадар-оол Монгуш алыр аас-кежиктиг болган.

“Вилада” садыг төвүнүң 1800 рубль түңнүг сетрификадын Чөөн-Хемчиктен Чимит Монгуш, Салбак Ооржак, Мыйдан Монгуш, Чаа-Хөлден Чойгана Шолур, Сүт-Хөлден Айдыс Монгуш, Барыын-Хемчиктен Владимир Күжүгет, Диана Ооржак, Чечен-оол Иргит, Өвүрден Артур Дупчун, Алексей Сундуй, Бай-Тайгадан Шагдыр Чудук, Майа Хертек ойнап алганнар.

“Pasta bar” кафениң 1000 рубль түңнүг сертификадын Ак-Довурак хоорайдан Владимир Күжүгет, Кызыл кожуундан А. Б. Кара-оол “Рыба Love” кафениң 1000 рубль түңнүг сертификадын, “Ваниль” кафениң 1000 рубль түңнүг сертификадын Чөөн-Хемчиктен Юрий Өлзей-оол ойнадып алганнар.

Ойнаашкынны “Таварылга болган саннар генератору” программа таварыштыр чоруткан. Шупту тиилекчилерни 8 (39422) 2-18-10 телефон дугаары-биле харылзажырын дыңнаттывыс.