Кызыл кожууннуң Кур-Чер сумузунга «Эзирлерниң уязы» төлевилел-биле туткан ангар хевирниң спорт залын ажыткан.
Суурнуң амыдыралында онза болуушкун-биле кур-чержилерге байырны ТР-ниң Дээди Хуралының Даргазы Кан-оол Даваа, депутаттар Елена Ховалыг болгаш Сергей Куулар олар чедирип, эки ажылдаан тудугжуларга парламентиниң шаңналдарын тывыскан.
Спорт залынга чаа теннис столун, хол бөмбүүнүң болгаш баскетболдуң бөмбүктерин Дээди Хуралдан белекке берген.
Спортчу байырлалдың ажыдыышкынында суурнуң командаларының аразынга хол бөмбүүнге маргылдаа, аныяк болгаш улуг мөгелер аразынга тыва хүреш, эстрада ырыларының күүседикчилериниң республика чергелиг «Хербис-2023» ыры мөөрейи болуп эрткен.
Депутаттар Кызыл кожууннуң Адалар чөвүлелиниң хуралынга база киришкеннер.
Кур-Черде чаа спорт залы ажыттынган
16 июля 2023
57