Москвада тыва чогаалчыларның чедиишкини

«Литературная газета» солуннуң тургусканы «Гипертекст» деп шаңналынга чогаалчы Зоя Донгактың «Хамның салым-чаяаны» деп чогаалы проза талазы-биле кыска даңзыже кирген.

Чогаалчыларның төп бажыңынга мөөрейни түңнеп, шаңналдарны тывыскан.

– Национал чогаал Россия деңнелинче үнүп эгелээни чедиишкин-дир. Чоокта чаа «Литературная Россия» солунга Тываның Улустуң чогаалчызы Артык Ховалыгның сонеттерин долу арын парлап чырыткан. Келир үеде тыва чогаалчыларның солун, ханы уткалыг чогаалдарын орус дылче национал хевири чидириг чокка очулдурары бистиң хүлээлгевис, ниити херээвис.

Тываның чогаалчылар эвилелинге бо талазы-биле боттуг дузаны чедирер ужурлуг бис. Ниитизи-биле шупту чогаалчыларга изиг байыр чедирдим. Чамдык карышкактыг четпестерни эдип, эвилел чаңгыс аай турарын чедип алыр ужурлуг бис – деп, Россияның чогаалчылар эвилелиниң даргазы Николай Иванов чугаалаан.

Чогаалчыларның төп бажыңынга «Силер-биле кады бис» деп ада-чуртчу поэзияның шүлүктер чыындызын таныштырган. Хөй национал чогаалчыларның шүлүктер чыындызынче тывалар база кирген.

Россияның хөй националдыг чоннарының чогаалчылары орус, чуваш, башкир, калмык, тыва, мордва дылдарга шүлүктерин номчуп, төрээн чериниң онзагайының болгаш чонунуң чоргаарланып турар маадырларының дугайында таныштырган.

Төрээн чурттуң национал республикаларның чогаалчыларының тускай шериг операциязында киржип турар дайынчыларга тускааткан шүлүктер чыындызын үндүрер бодал Тываже сургакчылаашкын үезинде тывылганын Россияның чогаалчылар эвилелиниң даргазы демдеглээн. Төлевилелди Россия Федерациязының камгалал сайыды Сергей Шойгу деткээн.

Чыындыже Тимур Кадын-Наваның, Чечена Монгуштуң, Борис Балчий-оолдуң шүлүктери, Юрий Духовскойнуң «Тываның дайынчыларынга» деп шүлүү кирген.