Национал школа хөгжүдер институттуң этнопедагогиктиг шинчилелдер лабораториязының ажылдакчылары Каа-Хем кожууннуң Бүрен-Хем суурнуң школа чанының «Найырал» хүндүскү лагеринче «Төрээн чер хүнү» деп тускайлаттынган хүнде баргаш, солун уттундурбас оюннарны эрттиргенин институт дыңнаткан.
«Найырал» лагеринде кээп турар уруглар тыва дылын эки билири, тыва чоннуң шаандан турар ойнап чораан национал оюннарының хевирлерин адап турары, чаңчылдарны сагып, тыва хевин кедип алганы чоргааранчыг.
Институттуң ажылдакчылары тыва оюннар дугайында солун көргүзүглүг материалдарын уругларга таныштыргаш, кажык оюнунуң «Аът чарыштырары» деп хевирин уруглар-биле катай ойнап, тиилекчилерни илереткен. Оон аңгыда «Арбай хоорну» уруглар-биле флешмоб хевирге көргүзүп ойнааннар.
Келген аалчыларга лагерьниң башкылары уруглары-биле четтиргенин илередип тыва улустуң самы «Челер-ойну» күүсеткени кайгамчык.
