Тываның Өөредилге болгаш Кадык камгалал яамыларының тускай мергежилдиглериниң ажылчын бөлүү Чагытай хөлдүң эриинде «Чагытай», «Металлург», «Байлак» болгаш «Орленок» уругларның кадыкшыдылга лагерьлеринче үнүүшкүннүг методиктиг десантыны чоруткан.
Эмнелге адырының ажылдакчылары уругларга психоактивтиг бүдүмелдер ажыглаарының хоразының база кижиниң арыг-шевериниң дүрүмнерин сагыырының дугайында тайылбырлап, чугааны чоруткан.
Республиканың психиатрия эмнелгезиниң ажылдакчызы «Бүзүрел телефонунуң» дугайында таныштырган, республиканың кеш аарыгларының диспансериниң эмчизи «Кеш аарыгларының профилактиказы. Хууда арыг-шевер» деп темага кичээлди эрттирген. Кадык амыдыралдың дугайында республиканың уруглар эмнелгезиниң эмчизи чугаалап берген.
«Сайзырал» төптүң ажылдакчызы 12 хардан өрү уругларга «Психологтуг арыг-шевер» деп темага, оон бичии уругларга «Ажык чок медээни арыглаары» деп темага тренинг-чугааны эрттирген.
Лагерьлерде дыштанып турар уруглар келген аалчылардан боттарының сонуургааны айтырыгларны салып, тодаргай харыыларны алганнар.
