Адакталып бар чыдар 2022 чыл Тыва спорттуң төөгүзүнге балалбас улуг исти арттырып каар чыл болган дизе частырыг болбас.
Чүге дээрге, бо чылын Тывага Россия Федерациязының сумога болгаш хостуг хүрешке ийи улуг чемпионады болуп эрткен.
Спорттуң кандыг-бир хевиринге Россияның чемпионадын ол-бо субъектиге эрттирерин чедип алыры белен эвес-даа болза, чаңгыс чылын хүрештиң ийи хевиринге Тывага Россия чемпионады эрттирер эргени бо чылын чедип алганы болгаш бедик шынарлыг эрттиргени-Тыва Республиканың Баштыңы Владислав Ховалыгның, тыва чазактың болгаш спорт яамызының, тыва спортчуларның, ылаңгыя мөгелерниң, улуг чедиишкини болур!
Спорттуң аңгы-аңгы хевирлеринге бо чылын шылгараан спортчуларны, оларның тренер-башкыларын, ада-иелерин, күш-культура болгаш спорт талазы-биле тергиидээн организацияларны, кожуун-хоорайларны илередип, шаңнап-мактаар «Спортэлита-2022» деп шуулган декабрь 20-де болуп эртер.
Ол дугайында Тываның спорт яамызының дужаалынга сайыт Субудай Монгуш адын салган.
Ам бо хүнде ол улуг спортчу байыр-найырга белеткел ажылдары чоруп турар.
Мерген КЫРГЫС
Фоточуруктар- «Тывамедиабөлүк» информастыг агентилелдиң болгаш Тываның спорт яамызының
