2023 чылдың январь 1-ден чурттакчы чонга хөмүрнү тоннада 2619,33 рубльге садар

Тываның Баштыңы Владислав Ховалыг биле «Тываның даг-руда компаниязы» кызыгаарлыг харыысалгалыг ниитилелдиң чиңгине директору Валерий Куликов социал-экономиктиг кады ажылдажылга дугайында дугуржулгага атты салганнар.

Регионнуң социал-экономиктиг хөгжүлдезинче, бүдүрүлге хемчээлин өстүреринче, Тываның даг-руда компаниязының бүдүрүлге-техниктиг база социал баазазын быжыглаарынче, Тыва Республиканың социал-экономиктиг хөгжүлдезинге ооң ролюн улгаттырарынче угланган ийи таланың харылзааларын документ өйлеп-таарыштырган.

Компанияның инвестиция ажыл-чорудулгазынга деткимчени көргүзерин республика Чазаа хүлээнген. Тываның даг-руда компаниязы бодунуң ээлчээнде, кожууннарның одал чүүл шыгжамырлары таварыштыр чурттакчы чонга хөмүрнү дүжүрерин хүлээнип турар.

2023 чылдың январь 1-ден эрге-чагырганың тургускан чиигелделиг өртээ-биле муниципалдыг тургузугларда чурттакчы чонга хөмүр садар шыгжамырларның даңзызын дугуржулгада айыткан.

Тываның Баштыңының бадылааны доктаалы езугаар, Тываның даг-руда компаниязы чурттакчы чонга хөмүрнү 2023 чылдың январь 1-ден тоннада 2619,33 рубльге садар. Чаа өртек 2021 чылдыындан, харын-даа ийи-үш чыл соңгаар турганындан эвээш.

Компания Тываның чурттакчы чонунга 230 муң тонна хөмүрнү дүжүрерин хүлээнген. Ол ышкаш регионнуң “Социал хөмүр” төлевилелинге ам-даа киржип, республиканың хөй ажы-төлдүг өг-бүлелеринге 21 сая рубльге хөмүрнү халас бээр.

Шынчы эвес хереглекчилерниң талазындан чиижең чоруктарны болдурбас дээш, чаңгыс информация бааза дузазы-биле хөмүр-дашты садып ап турарынга учетту чорударын ийи тала дугурушкан.

Регион Чазаа биле Тываның даг-руда компаниязының аразында дугуржулга езугаар, регионнуң эрге-чагыргазы 2022 чылда хөмүр-даш өртээнге өзүлдени болдурбаанын сагындыраал. Республика чурттакчыларынга хөмүрнү чиигеткен өртек-биле тоннада – 2220,10 рубльге, рынок өртээнден 38 хуу эвээшке саткан.

Оон аңгыда, республиканың бюджет организацияларынга база чылыдылга-энергетика комплекизиниң бүдүрүлгелеринге хөмүрнү чиик өртекке садарын Тываның даг-руда компаниязы-биле дугурушкан турган.

Республиканың чазаа компанияга компенсация кылдыр хөмүрүн экспортче үндүр садар магадылалды федералдыг деңнелге дугурушкан. БАМ биле Транссибтиң эрттирилге аргалары кызыгаарлыг болганындан, Чөөн чүкче чүък сөөртүлгезинге квотаны киирген.

Бо удаада республиканың эрге-чагыргазы биле хөмүр тывыш компаниязы кады ажылдажылганы өйлээн ийиги дугуржулганы чарган. Бирги документ бо чылдың декабрь 31-ге чедир күштүг. А чаа чардынган дугуржулга бир чыл ажылдаар.

Тыва Республикада хөмүр-даш уургайының ээзи «Тываның даг-руда компаниязы» кызыгаарлыг харыысалгалыг ниитилел (En+ Group бөлүкте кирип турар) дээрзин сагындыраал. Бир участогу Кызыл кожуунда болза, ийигизи – Чөөн-Хемчик кожууннуң девискээринде.