2024 чылда 36 школаны бүрүнү-биле чаартыр

Тываның Өөредилге яамызы 2024 чылда 36 школаны бүрүнү-биле септеп-чаартыр төлевилелдерни белеткээн.

Ыраккы Өвүр кожууннуң Ак-Чыраа суурда школаның капитал септелгези доостур чадазында. “Өөредилге” национал төлевилел-биле бо чылын чаартынар 13 ниити өөредилге черлериниң бирээзи ол.

ТР-ниң Өөредилге яамызының медээзи-биле алырга, шупту объектилерде септелге ажылдары 60 хуу чеде берген. Ам албан чери 2024 чылда национал төлевилелге киришкеш, эде чаартынылгаже кордаар школалар даңзызын тургузуп эгелээн.

Бөгүнде капитал септелге талазы-биле төлевилелдерлиг 36 албан чери даңзыже кирген. Тываның Баштыңы Владислав Ховалыг көдээ школаларны чаартып алыр арганы ажыглаар дээш, муниципалдыг тургузугларның удуртукчулары ол ажылга киржирин кыйгырган.

Өөредилге сайыды Елена Хардикова объектилерде чаартылга ажылдарының хуусааларын боду хыналдада алган. Сайыт неделя санында кожууннарже үнүп турар. Эрткен неделяда ол Тес-Хем кожуунда О-Шынаа суурнуң школазынга четкен.

Көрдүнмээн чамдык ажылдар чоруп турары хыналда үезинде билдинген. Төлевилел-дөзевилел документациязын шын эвес тургусканындан ол болу бергенин сайыт чугаалаан: «Ооң түңнелинде, төлевилел-дөзевилел документациязында кирбейн барган немелде ажылдарга элээн түңнүг акша салыышкыны херек апарган» – деп, сайыт чугаалаан.

Ам-даа дөрт школага капитал септелге хереглеттинип турар болганда, моон соңгаар ындыг документилерни кылырда эки хынап, кожуун чагыргазы ону бодунуң хыналдазынга алырын сүмелээн.

Тываның Баштыңы федералдыг программага киржир чагыгны киирер школалар санын көвүдедирде, төлевилелдерни ажылдап кылыр даалганы яамының мурнунга тургускан. Муниципалдыг кожууннар чагыргалары ол ажылга эң идепкейжи ажылдаар ужурлуг.