ТР-ниң Экономиктиг хөгжүлде болгаш үлетпүр яамызы 2025 чылда республиканың чурттакчыларынга сайгарлыкчы ажыл-херектерге өөредир болгаш хөгжүдер талазы-биле ажылдаанының түңнелдерин үндүрген.
Яамының удуртканы албан чери «Мээң бизнезим» сайгарлыкчы чорукту деткиир төп бодунуң херээн эглеп алыр деп планнаан хамаатыларга комплекстиг деткимчени көргүскен бо угланыышкынны боттандырып турар.
Яамының дыңнатканы-биле алырга, эрткен чылда «Мээң бизнезим» төптүң эрттирген 18 өөредилге хемчеглеринге 700 ажыг кижи киришкен. Программалар эгелеп чоруур сайгарлыкчылар, амгы үеде ажылдап турар бизнестиг, ажыл-биле бот хандыртынган кижилер, хууда дузалал ажыл-агыйларының төлээлери, тускай шериг операциязының киржикчилери болгаш оларның өг-бүлелери, ол ышкаш аныяктар болгаш школачылар дээш, янзы-бүрү бөлүктерниң кижилеринче угланган. «Үре-түңнелдиг болгаш чижилгелиг экономика» национал төлевилел езугаар хемчеглерни боттандырган.
Бизнести эгелеп, сайзырадырынга ажыктыг тускай билиглерни болгаш мергежилдерни сайзырадырынче: саң-хөө болгаш үндүрүг билиглерин бедидери, ачы-дуза болгаш хандырылга стандарттары, рыноктуң ажыл-чорудулгазы, экспорт чорудуу, адырларның негелделери, чаңчылчаан угланыышкыннарны болгаш чогаадыкчы индустрия хөгжүлдезин таныштырарынче онза кичээнгейни угландырган.
Отчеттуг үениң дургузунда янзы-бүрү хевирлерлиг программалар болгаш хемчеглер боттанган, оларның аразында «Сайгарлыкчы чоруктуң эге билиглери» база «Бизнес-навигатор», «СВОй бизнес: ачы-дузадан бодунуң ажыл-херээнче» программа, школачыларга өөредилге программалары, ачы-дуза болгаш хандырылга стандарттарынга өөредири.
«Социал керээлер» чарар кордакчыларга, улусчу ус-шеверлел мастерлеринге, даараныр мергежил өөредилге, тускай шериг операциязының киржикчилериниң кадайларынга болгаш иелеринге мастер-класстар, бараанны демдектээринге болгаш адырның негелделеринге семинарлар, маркетплейстер-биле ажылдаары, экспорт ажыл-чорудулгазы болгаш хоойлужудулгада өскерлиишкиннер дугайында өөредилгени организастаан.
Тыва аъш-чемни сайзырадыр төлевилелдерни боттандырып, үдекчи-экскурсоводтарга бөлүк лекцияларны эрттирген. Сайгарлыкчыларга РВБ (Wildberries & Russ) биле Эчис сорулгалыг эгелээшкиннер агентилелиниң кады боттандырганы «Өзүлде шөлчүгежи» деп федералдыг дүрген өзүлде программазынга киржир арганы бергени чылдың чугула болуушкуну болган.
Регионнуң сайгарлыкчыларынга бүгү талалыг деткимчени көргүзүп турар «Мээң бизнезим» төп республиканың биче болгаш ортумак сайгарлыкчы чоруун хөгжүдер инфратургузуунуң чугула кезээ болур. Бөгүнде ооң шөлүнге хууда сайгарлыкчы чорукту бүрүткедип, Ажаалга банкызының агар санын ажыдып ап болур апарган. Бүрүткедири дыка белен: бизнес-төпке чеде бергеш, анкетаны долдурар. Төптүң тускай мергежилдиглери силерниң хууда сайгарлыкчы чорууңарны бүрүткедир дугайында билдириишкиниңерни боттары долдургаш, бүрүткептерге, агра санны онлайн ажыттырып бээр.
Бүрүткел кылдырарда Россия Федерациязының хамаатызының паспорту, СНИЛС, ИНН херек. Төптүң тускай мергежилдиглери силерге ОКВЭД кодтарын шилижип, сайгарлыкчы чорукту ажыдарынга хамаарышкан бүгү-ле айтырыгларга сүмелерни бээр.
Төптүң турар адрези: Кызыл хоорай, Эки турачылар кудумчузу, 18. Сайгарлыкчы чорук хөгжүдер чаңгыс аай төп – 2 дугаар каътта 212 дугаар өрээл.