Тываның Баштыңы Владислав Ховалыг Дээди Хуралга Айыткалының үезинде 2025 чылдан эгелээш республикага уруглар садтарынга үндезин септелге чорудар федералдыг программа боттанып эгелээрин дыңнаткан.
Бо чылын программаның чорудуу-биле Мөңгүн-Тайга кожууннуң Мугур-Аксында «Чечек» уруглар садын бүрүнү-биле чаартыры планнаттынган. Дараазында ийи чылда Барыын-Хемчик кожууннуң Кызыл-Мажалык болгаш Чеди-Хөл кожууннуң Ак-Талда уруглар садтарын үндезини-биле септээр.
Эрткен чылын «Көдээ девискээрлерниң комплекстиг хөгжүлдези» программаның күүселдези-биле Сарыг-Септе «Родничок» уруглар садын бүрүнү-биле септээнин сагындыраал. Ында 220 уруг 12 бөлүкте хаара туттунган. Школа назыны четпээн уруглар албан черин 1988 чылда туткан.