2026 чылга чедир орук шимчээшкининиң дүрүмнер хажыдыышкынын тырттырар 20 чаа чурук-видео системазын тургузар

Бо хүннерде республикада орук шимчээшкининиң дүрүмнерин хажытканын тыртырар автоматчыткан чурук-видео бижидер 85 комплексти идепкейлиг ажыглап турар. Оларның хөй кезии, азы 39 комплекс Кызылдың муниципалдыг оруктарында.

Регионалдыг автооруктарда база Р-257 «Енисей» федералдыг автоорукт 29 комплексти салган. Арткан дериг-херекселдерини Кызыл биле Каа-Хем кожууннарның муниципалдыг оруктарында салып, планныг орук септелге ажылдары чоруп турар девискээрлерде кошкан.

Бо чылын чурук-видео бижидер чеди чаа комлексти салган. Оларның дөртүн хөй озал-ондактар болуп турар орук участоктарынга тургустунган. Сарыг-Сеп суурда, ол ышкаш Бии-Хем кожууннуң Сөш биле Билелиг суурлар чоогунда Р-257 федералдыг автоорукта үш чаа системаны немей салган.

2025 чылдың январь 1-ден орук шимчээшкининиң дүрүмнерин хажытканы дээш чурук-видео бижидер системаларның ажылдаарын чурумчудар чаа дүрүмнер Россияда күшче кирген. Ам камералар чүгле дүрген халдып, кызыл чырыкты эрте бергенин эвес, а айыыл чок курун шарып албааны, тургузуп болбас черлерге, ооң иштинде чадаг кижилер кежер оруктарга доктааганын, ол ышкаш чадаг кижилерге орук чайлап бербээн чурум хажыдыышкыннарын бижип демдеглеп турар.

Регионнуң орук шимчээшкинин башкарар төвүнүң дыңнатканы-биле алырга, бо чылдың эгезинден бээр республикада автоматчыткан чурук-видео бижидер комплекстиң дыңнадыынга даянып, чолаачыларга онааштыр 263185 административтиг чурум хажыдыышкынының доктаалдарын үндүрген. Эрткен чылдың ол үезинге деңнээрге, ол 25 хуу хөй. Чурум хажыдыкчыларынга онааган торгаалдарның ниити түңү 300 сая рубль ажа берген.

«Чурум хажыдыышкыннарын тода бижидиптер амгы үениң дериг-херекселдери-биле камераларны чепсеглээн, олар автотранспорт ээлеринче дыңнадыгны дораан чорудуптар. Чурум үрээшкиннерин ол дораан бүрүткептер болгаш, хууда миннишкинниг чылдагаанннарны болдурбас» – деп, ТР-ниң Орук-транспорт яамызы дыңнаткан.