Тыва үндезин культура төвүнге Д.С. Кууларның 90 харлаан юбилейинге болгаш Тыва дылдың хүнүнге тураскааткан «Аас чогаалга бердинген чуртталга» деп литературлуг кежээ болуп эрткен.
Тыва дылдың хүнүн эрттирип тура, тыва дылга, чогаалга, тыва улустуң аас чогаалынга улуг үлүг-хуузун киирген башкывыс, фольклорист, чогаал шинчилекчизи, критик, очулдурукчу, филология эртемнериниң доктору, Тыва АССР-ниң алдарлыг эртем ажылдакчызы чораан Доржу Сенгиловичини сактып, ооң кылып чораан ажыл-ижин өөреникчилери, төрелдери чыглып келгеш, чугаалашкан.
Кежээге эртемденнер, чогаалчылар, башкылар Д.С. Кууларның хөй талалыын демдеглеп, чылыг, чырык сактыышкыннарны кылып, илеткелдерни номчаан.
