«Абилимпикс-2023» чемпионаттың регион чадазынга 163 кижи киржир

Кадыкшылының байдалы-биле харык-шинээ кызыгаарлыг кижилер аразынга профессионал мергежилге «Абилимпикс» национал чемпионаттың регион чадазынга Тывада 163 кижи киржир.

ТР-ниң Өөредилге яамызының дыңнатканы-биле алырга, апрельдиң 10-14 хүннеринде эртер регионнуң кол маргылдаалаыр дараазында угланыышкыннарга болур: чинчи-шурудан кылыгларга, ыяштан оюп сиилбииринге, уран дааранылгага, чазанылгага, дааранылгага, быжарынга база чемнер кылырынга, аргыыр аткак болгаш спица-биле аргыырынга, уран чурулгага, идик септээринге, веб-дизайнга, очулгага, сөзүглел ажылдаарынга, эмчи болгаш социал ажаалдага, ол ышкаш региондан ийи чүүлге – тыва хуужуур база хөмден кылыгларга (кымчы кылыры).

Регион чемпионады сес албан чериниң баазазынга – дыңнавас уруглар школа-интернадынга, Кадыкшылының байдалы-биле харык-шинээ кызыгаарлыг уругларның 10 дугаар школазынга, Тываның Тудуг техникумунга, Тываның информация технологияларының техникумунга, Тываның политехниктиг техникумунга, Тываның медицина колледжизинге, Тываның күрүне университединге, Кадыкшылының байдалы-биле харык-шинээ кызыгаарлыг улустуң Күш-ажылчы Кызыл тук орденниг бүгү-российжи хөй-ниити организациязының Тывада республика организациязынга болуп эртер.

Регион чемпионадының тиилекчилери чурттуң аңгы-аңгы булуңнарындан чыглып келген кадыкшылының байдалы-биле харык-шинээ кызыгаарлыг уруглар-биле кады, Россияның субъектилеринге 214 аңгы угланыышкынынга өөренип алган чүүлдерин база профессионал мергежилдиин эксперттерге көргүзер. Профессионал мергежил маргылдааларындан аңгыда, ажыл-агыйжы болгаш өөредилге программалары, мастер-класстар, хостуг ажылчын олуттар ярмарказы болуру айыттынган.

Регион чадазынга тиилээн улус октябрьның 17-25-те Москвага чылдың-на эртип турар «Абилимпикс» национал чемпионатка киржир.
Кадыкшылының байдалы-биле харык-шинээ кызыгаарлыг кижилер ортузунга профессионал мергежилдиң «Абилимпикс» чемпионады «Россия – аргалар чурту» деп президент шөлчүгежиниң бир кезээ болуп турар.

Шимчээшкинни Кадыкшылының байдалы-биле харык-шинээ кызыгаарлыг улустуң мергежил чедип алырын деткип, шынарлыг профессионал угланыышкынны берип, оларның ажылга тургустунарынга дузалажып, ниитилелде социокультурлуг ылгалды чок кылыр дээш эгелээн.