Ачы-буян акцияларының идепкейлиг киржикчилери

Шагаага уткуштур база Ада-чурт камгалакчыларының хүнү таварыштыр тускай шериг операциязында киржип турар дайынчыларга деткимче чорудар ажыл шалыпкын чоруп турар.

Бии-Хем кожууннуң Аржаан сумузунуң чурттакчы чону республикада чарлаттынган «Бүгү чүүлдү тиилелге дээш», «Буянныг манчы» деп ачы-буян акцияларынга каттыжып, идепкейлии-биле киржип турар.

– Тывавыстың эрес-дидим оолдарының хей-аъды, сүлде-сүзүү кезээде бедик болурун күзевишаан, сумунуң чурттакчы бүрүзү тускай дайынчы хөделиишкиннерде киржип турар чаңгыс чер-чурттугларывыска болгаш оларның өг-бүлелеринге деткимчени шаавыс-биле көргүзүп турар бис. Оолдарывыс шупту онча-менди чанып келзиннер –деп, Аржаан сумузунуң чагырга даргазы Екатерина Түлүш дыңнаткан.

Аржаанчылар шериглерге чылыг чеңи-чоктарны даараап, далган, боорзакты белеткээннер.

Шагааның бүдүү айында чылдың-на эртер “Ачы-буянның манчызы” деп акцияга аржаанчылар база доктаамал киржип турар. Бо чылын сумунуң эвээш орулгалыг өг-бүлелери болгаш хоочууннарыдан аңгыда тускай шериг операциязында киржип турар чаңгыс чер-чурттугларының өг-бүлелеринге база манчыны дамчыдар.

Ачы-буян акцияларның киржикчилериниң саны Шагаа байырлалы чоокшулаан тудум улам-на көвүдеп турар.