«Ада-чурт камгалакчылары» күрүне фондузунуң салбырында бүгү талалыг дузаны чедирип турар

Тывада «Ада-чурт камгалакчылары» фондунуң регионалдыг салбыры бодунуң ажылын июнь 1-де эгелээн. Тускай шериг операциязының хоочуннарын, Ада-чурт камгалаар хүлээлгезин күүседип тургаш, амы-тынындан чарылган болгаш балыгланган дайынчыларның өг-бүлелерин хуузунда үдээри фондунуң кол сорулгазы.

Социал координаторлар баштайгы алды ажыл хүнүнде келген чүс ажыг кижиниң 90 хире билдириишкинин ажылдап кылганын салбыр дыңнаткан.

Ында тускай өөредилге эрткен социал координаторлардан аңгыда, Хөй хүлээлгелиг төптүң, Чонну ажылга хаара тудар төптүң, Эмчи-социал экспертизазының кол бюрозунуң база Кадык камгалал яамызының тускай мергежилдиглери ажылдап турар.

Ол ышкаш, Кызылда бактааттынган 55-ки тускай мото-адыгжы (даг) бригаданың хууда состав-биле ажылдаар ажылдакчылары салбырның баазазынга хамаатыларны неделя санында хүлээп алыр кылдыр бригаданың командылал чери-биле чугаалажып турар.

Келген кижилер колдуунда тускай төлевирлерге, дайынчы хөделиишкиннер хоочуну эрге-байдалды тыпсырынга документилерин киирип, ис чок читкен дайынчыларны дилээринге дуза дилеп кээп турар. Балыгланган дайынчыларны эмнелгеге чыттырарынга база реабилитация эрттиреринге, уруглар садынга ажы-төлүн тургузарынга, уруглар лагерьлеринче путевка алырынга деткимче көргүзерин дилээн дилеглер хөй.

Фондунуң регионалдыг салбырының тускай мергежилдиглери дараазында адресте хүлээп турарын сагындыраал: Кызыл хоорай, Кызыл партизаннар кудумчузу, б. 30, понедельниктен пятницага чедир, 9.00-18.00 шактарда.

«Ада-чурт камгалакчылары» фондунуң Тывада салбыры шупту социал четкилерде бар: ВКонтакте – https://vk.com/fondsvotuva, Одноклассники – https://ok.ru/group/70000002766870, Телеграм –https://t.me/fondsvotuva