Ада-чурт камгалакчызының чылынга тураскааткан хуреш маргылдаазы

Суг-Аксы сумузунуң уругларның болгаш элээдилерниң спорт школазынга Тускай шериг операциязының хоочуннар ассоциациязының кежигүннери Ада-чурт камгалакчызының чылынга тураскааткан кожуун чергелиг аныяк мөгелер аразынга долгандырыг хевирге тыва хуреш маргылдаазын организастап эрттиргенин чагырга чери дыңнаткан.

Ачыр-дачыр тудушканының түңнелинде бирги черге Суг-Аксындан Иден Монгуш, ийиги черге Алдан-Маадырдан Субудай Кастык-Доржу төлептиг болганнар.

Үшкү-дөрткү шаңналдыг черлерни Кызыл-Тайгадан Самир Ондар, Кара-Чыраадан Александр Ондар үлешкеннер.

Сүт-Хөл кожууннуң удуртулгазы Тускай шериг операциязының хоочуннар ассоциациязының кежигүннеринге, чаңгыс чер чуртуу, «Кара ирбиш» хөй-ниити организациязының даргазы Айдыс Кууларга сүт-хөлчүлерниң мурнундан четтиргенин илереткен.