Ада-чурттуң Улуг дайынының киржикчилери кезээ мөңгеде дириг артар

Улуг Тиилелгениң 77 чылынга тураскааткан «Өлүм чок полк» деп Бүгү Россияда чарлаан ада-чурту акция бо чылын чаңчыл езугаар болуп эртер.

Чыскаалга дайын хоочуннарының, тыва эки турачыларның салгалдары, ажы-төлү, уйнуктары, дөргүл-төрели кырган-ачалары, кырган-аваларының чуруктарын бедик тудуп алгаш чоргаар эртер. Оларның-биле эгин кожа Украинага тускай операцияга чок болган дайынчы маадырларның чуруктарын тудуп алгаш киржип болурун эрттирикчилер дыңнадып турар.

Тыва бо сактыышкын акциязынга 2013 чылда катчып, чүгле Кызылга чыскаалып турган. Амгы үеде «Өлүм чок полк» акцияны республиканың кожууннарынга демдеглээри чаагай чаңчыл болу берген. Тыва Арат Республикадан 3000 ажыг совет хамааты болгаш 230 тыва эки турачы фронтуже аъттанган.

“Өлүм чок полктуң” чыскаалынга Ада-чурттуң Улуг дайынының киржикчилери кезээ мөңгеде дириг артар.

Коронавирус хамчыы-биле холбаштыр бүгү ажыл-хемчеглерни соксадып каапкан-даа бол, сактыышкын акциязы онлайн чурумга ийи чыл дургузунда эрткен.

Чылдар эрткен тудум, дайын-чааның чаңгызы ырап, 1940-1945 чылдарда Ада-чурт дайынының киржикчилериниң саны эвээжеп турар. Ынчангаш фронтучуларга хүн бүрүде хүндүткелди болгаш кичээнгейни сагыш-сеткилдиң ханызындан илередири онза чугула.