Сезен бир чыл бурунгаар ССРЭ-ниң Маадыры Михаил Бухтуев Ада-чурттуң Улуг дайынының төөгүзүнде кирген маадырлыг чорукту кылган.
Тыва Арат Республиканың Тожу кожууннуң чурттакчызы 18 харлыг Михаил Бухтуев 81 чыл бурунгаар июнь 25-те маадырлыг чорукту кылган – дайынның төөгүзүнде фашистиг куяк шыпкан поездиже чаңгыс танк-биле халдаашкынны кылган, ол дээш өлген соонда ССРЭ-ниң Маадыры деп аңаа атты тывыскан.
Михаил Бухтуев мурнуку одуругга тургаш, Черные Броды станциязының чоогунда турумчуп турган дайзынның куяк шыпкан поездизинче халдаан. Совет шериглерге куяк шыпкан поездиниң айыылын узуткаарынче угланган бо тактиктиг маневр, шериг чажыт хөделиишкинни болгаш кам хайыра чок чорукту ажыглаарының билдингир чижээ болур. Ол шиитпирни дайынчы машинаның командири лейтенант Д.Е. Комаров-биле кады хүлээп алганнар.
Маадыр дайынчы даалганы күүсеткеш, дайынчы машиназындан үнүп чыташ мөчээн. Маадырлыг чорук-биле стратегтиг чугула сорулга чедип алдынган – дайзынның эшелону чок кылдынган. Коргуш чок маадырлыг чорук чүгле совет шериглерниң амы-тынын камгалаанындан аңгыда, дараазында тулчуушканнарга дайзынның камгаланыр арга-шинээн кошкаткан.
ССРЭ-ниң Дээди Совединиң Президиумунуң 1944 чылдың сентябрь 26-ның Чарлыы-биле Михаил Артемьевич Бухтуевке мөчээниниң соонда Совет Эвилелиниң Маадыры деп атты тывыскан. Михаил Бухтуев Ада-чуртунга бараан болурунуң үлегер-чижээ болган. Төрээн чуртунуң камгалалы, тайбыңны кадагалап арттырарының чугулазын ооң маадырлыг чоруу сагындырып турар. Бо чижек чурттуң айыыл чок чоруунуң айтыргларынга база хөй-ниитиниң медерелин хевирлээринге көскү чижек болуп арткан.
Кызыл хоорайның №1 школазынга өөренип чораан Михаил Бухтуевке тураскаадып, ол школаны Совет Эвилелиниң Маадырының адын тывысканын сагындыраал. 1961 чылдың май 10-да өөредилге чериниң 45 чыл оюнга тураскааткан байырлал үезинде ону тывыскан. А 1984 чылда Кызылдың Топография кудумчузу Бухтуев кудумчузу деп өскерилген.