Ада-ие дыштанылга үезинде ажы-төлү дээш харыысалгалыг болур ужурлуг

ТР-ниң Чазак Даргазының оралакчызы Орлан Сарыглар ада-иелерни ажы-төлүн хайгаарал чокка арттырбазынче кыйгырган.

– Чайның изиинде уруглар хем-сугга ойнаксаар, а ада-ие оларны хайгаараар чайы чок. Ооң түңнелинде эштип билбес уруглар суг айыыл-халавынга таваржыр. Олар хоруглуг база эштиринге таарымча чок, дериттинмээн черлерде сугга бодун алдынарының дүрүмнерин, камгаланыр аргаларны билбезинден, баштайгы эмчи дузазын чедирип шыдавазындан амы-тынындан чарлып турар.

Ада-иелерни харыысалгалыг болурун дилеп тур мен. Уруг-дарыы-биле сугга айыыл чок чорук дугайында доктаамал чугаалажыр. Школа назыны четпээн болгаш эге школа назылыг уруглар чүгле эштиринге таарымчалыг кылдыр тускай дериттинген черге болгаш ада-иениң хайгааралы-биле эштип болур. Кандыг-даа таварылгада уруг-дарыыңарны хайгаарал чокка арттырбаңар!