Кызыл хоорайның солагай талакы эриинде дачаларда 18 дугаар школа ажыттынга-ла, дөрт чыл чеде берген. Ында 2700 уруг өөренип турар. Тываның өөредилге сайыдының хүлээлгезин күүседип турар [id16282405|Ренат Ооржак] школаның коллективи-биле ужурашканын яамы дыңнаткан.
– Кызыл хоорайның солагай талакы эриинде дачаларда 18 дугаар школага чедип, оларның ажыл-ижи-биле таныштым. «Өөредилге» национал төлевилел-биле туткан школада 2700 уруг өөренип турар. Бо хүнде школада 177 башкы ажылдап турар. Өөредилгениң шынарынга хамаарышкан айтырыгларны сайгарып чугаалаштывыс. Өөредилге программаларын болгаш кичээлден дашкаар программаларның, немелде өөредилгениң долузу-биле боттанып турары база бисти дүвүредип турар айтырыг – назы четпээннерниң ортузунда корум-чурум профилактиказы. Статистикадан алгаш көөрге, сан-чурагайлар ындыг-ла эки эвес. Аңаа хамаарыштыр чидиг айтырыгларны коллегаларым-биле сайгарып көрдүвүс. Эр башкылар-биле база аңгы чугааны кылдым: берге аажы-чаңныг уруглар-биле, социал айыылдыг байдалды тургузуп турар өг-бүлелер-биле канчаар ажылдаарыл. Коллегаларымның санал-бодалын дыңнадым. Моон-даа соңгаар кады ажылдажылганы уламчылаар бис!
Школаның коллективиниң талазындан идепкейлиг ада-иелер-биле демнежип тургаш, уругларга кичээлден дашкаар ажыл-чорудулгага таарымчалыг байдалдарны тургузарынче кызыдыышкыннар бары каракка көскү. Өөреникчилер аңгы-аңгы секциялар, бөлгүмнерже барып турар. Школада салым-чаяанныг чурукчу башкы Омак Васильевич Донгак ажылдап, ханаларны чараштыр чураан. Ол ышкаш хүреш секциязы оолдарга эжиин ажыткан. Мөге оолдар, эр хейлер! Олар кадык болгаш эки амыдыралче сорулганы салган. Школаның подвалында ада-иелерниң күжү-биле хостуг хүреш болгаш бокс секциязының өрээлдерин белеткей бергеннер. Бо талазы-биле оларга деткимчени көргүзери чугула, чүге дизе ук школаның өөреникчилери спортчу чедиишкиннерин көргүзүп эгелээн.
Чаңчыл езугаар тоску классчылар-биле математикага күрүне шылгалдаларынга белеткел кичээлди эрттирдим. Элээн каш бодалгаларны бодадывыс. Оргаадай биле Милана эки харыылап турдулар. Шылгалдаларны чедимчелиг дужаап алырын күзээр-дир мен. Оларның түңнелдерин хайгаараар мен.
Кызыл хоорайның Өөредилге департаментизи-биле кады школаның ада-иезиниң ниити хуралын эрттирер деп дугурушувус – ада-иелер кижизидилге айтырыында кол черни ээлеп турар, ынчангаш оларның деткимчези чүгле уруг-дарыгга эвес, а башкыларга база чугула херек. Өг-бүледе байдалдан уругнуң иштики сагыш-сеткили кончуг хамааржыр, ооң-биле кады аажы-чаңы, өөредилгези база. Солагай талакы эрикте дачалар ышкаш нарын районда уруг-дарыгны өөредип, кижизидип турары дээш школаның коллективинге четтиргенимни илереттим… – деп, Ренат Ооржак бодунуң блогунда бижээн.
