Октябрьның үшкү улуг-хүнүнде Россияда Адалар хүнүн демдеглеп эрттирери чаңчыл апарган. 2021 чылда Президентиниң Чарлыы-биле байырлалды тургускан.
Бо чылын Адалар хүнүн октябрь 19-та демдеглээр. Ол байырлалды демдеглээри-биле бүгү республиканың өөредилге болгаш культура албан черлери «класс шактарын», темалыг ада-ие хуралдарын, ол ышкаш өг-бүлениң үнелиг чүүлдерин быжыглаар аңгы-аңгы мастер-класстарны болгаш хемчеглерни эрттирер.
Бо чылдың онзагай болуушкуну – Кызылдың Өг-бүле парыгынга Адалар аллеязын тургусканы. Тываның найысылалында хөй-ниитижилерниң болгаш эки турачыларның киржилгези-биле ыяштарны тараан. Бо төлевилел өг-бүлеге болгаш ажы-төл кижизидилгезинге адаларның ролюнче кичээнгейни угландырар сорулгалыг.
Тывада Адалар хүнүнге тураскааткан кол хемчеглер: октябрь 17 – «Мээң ачам – мээң камгалакчым» адалар шуулганы, «Аданың хүлээлгези» адаларга тренинг («Сайзырал» республика төвү).
Ол ышкаш октябрь 13-30 хүннеринде өг-бүлениң үнелиг чүүлдерин быжыглаар, культура-дыштанылга болгаш спорчу хемчеглер болуп эртер.