Бай-Тайга кожууннуң чагырга чериниң даргазы Аржан Хертекке удурткан ажылчын бөлүк Адыр-Мажалык бугазында эгелээн ажылды сонуургап, үнүүшкүннү кылганын чагырга чери дыңнаткан.
Эрткен чылдың байдалы-биле чай кааң болганын барымдаалап, бо чылын чоннуң малының одар-белчиири, оът-сигени суггаттыг болуру-биле хемчеглерни баш удур чорудуп эгелээн. Ында Ээр-Хавак болгаш Тээли сумуларының эр чону катчып алгаш, ажылдап эгелей бергеннер. Ажыл кидин түлүк чоруп турар.
Шуй сумузу биле кадыкшылга школазының аразында Барлык суурнуң үрелген көвүрүүнүң байдалын база ол ышкаш чайгы үеде Шуй сумузунуң чурттакчыларынга айыыл болдурбазы-биле ооң достуруун кылыр сорулга салдынган турган. Ниити сугнуң деңнелин, байдалын база хынап, ук ажылды боттандырары-биле чүнү кылып болурун, база кандыг аргалар барын дугуржуп көөрү-биле кожууннуң удуртулгазы үнүүшкүннү кылган.
Улаштыр Шуйнуң кадыкшылга школазында уругларның ниити чурттап турар байдалдарын, дыштаныр хонуктарын болгаш хостуг үезин канчаар эрттирип турарын база хынап көргеннер.
