Курлавырда тускай шериг операциязының хоочуннарынга болгаш киржикчилеринге «Агромотиватор» грантызының шилилдезинге киржир чагыгларны март 15-те хүлээп эгелээн.
“Ада-чурттуң камгалакчылары” күрүне фондузунуң Тывада салбырының дыңнатканы-биле алырга, тускай шериг операциязының 26 хоочуну ТывКУ-га «Арат-тараачын ажыл-агыйын башкарарының үндезиннери» кыска хуусаалыг мергежил бедидер курстарны дооскаш, шынзылга бижиктерни алган.
Мал ажыл-агыйлыг Тывага тускай шериг операциязының киржикчилерин деткиир чаа хемчег онза чугула. Дайынчылар грант алыр арганы дыка сонуургап турар.
«Агромотиватор» – Көдээ ажыл-агый яамызының тускай шериг операциязының киржикчилеринге чаа грантызы. Деткимчениң түңү – чеди сая рубльге чедир.
Россияның Чазаа чурттуң Президентизиниң даалгаларынга даянгаш, көдээ ажыл-агый хөгжүлдезиниң күрүне программазын эде көрген. Күрүнеден субсидияны көдээ ажыл-агыйынга сайгарлыкчы ажыл-херекти эгелээр күзелдиг дайынчыларга бээр.