Бии-Хем кожууннуң Аржаан сумузундан тускай шериг операциязының киржикчизи Ахмет Маадының чырык адын мөңгежидип, тураскаал самбыраны ажыткан.
Аржаан ортумак школазының доозукчузу, коргуш чок дайынчы албан-хүлээлгезин эрес-дидими-биле күүседип тургаш, амы-тынындан чарылган. Маадырны «Эрес-дидим чоруу дээш» орден-биле мөчээн соонда шаңнаан.
ТР-ниң Дээди Хуралының даргазы Кан-оол Даваа , Росгвардияның Тыва Республика талазы-биле эргелелиниң удуртулгазы, чыылган чон чаңгыс чер-чуртуунуң дугайында чылыг сактыышкыннарны кылган.
Кажыыдалдың минутазын чарлаан соонда, маадырның чырык адынга тураскааткан тураскаал самбыраны өөнүң ишти Артышмаа Маады ажы-төлү-биле ажыткан.
– Өзүп орар салгалдарывыска Ахмет Бүрүшпел-оолович ышкаш чурттун камгалап тургаш маадырлыы-биле амы-тынын салган дайынчыларывыстың чырык овур-хевирин дамчыдар ужурлуг бис. Ооң ады Россияның шериг алдарының төөгүзүнче мөңгеде киир бижиттинген. Бистер аңаа кезээде чоргаарланыр, ооң маадырлыг чоруун утпас ужурлуг бис – деп, Кан-оол Даваа чугаалаан.
Росгвардияның Тыва Республика талазы-биле эргелелиниң дайынчылары ок-чепсээниниң делгелгезин бараалгадып, школачыларга маадыр шериг эжиниң дугайында сактып чугаалаан.
Эрес-дидим чаңгыс чер-чуртуунуң маадырлыг чоруун аржаанчылар кезээде утпас. Школаның башкылары Ахмет Маадының эрес-дидим чоруун өзүп орар салгалдарга үлегер кылдыр арттырар дээш, класс шактарын, шугум чыскаалдарын доктаамал эрттирерин дыңнаткан.
Эрткен чылын өөредилге албан черинде ооң адынга тураскааткан «Маадырның партазын» ажытканын сагындыраал.