Бии-Хем кожууннуң Тарлаг сумузундан «Кыштаг» төлевилелиниң киржикчилери – Ай-Чүрек Сат биле Долаана Конгар.
Дөрт ажы-төлдүг аныяк малчыннар 2021 чылда Тарлагның Тарлаг-Аксы деп черге кыштаан тудуп алганнар. Одар-белчиирни солууру-биле, тайгалар эдээнде, Каскан-Суг деп черде бир дугаар чайлаглап келген.
– Малывысты семиртир дээш чайлаглап келгенивис бо. Кады төрээн акым болгаш кожаларым-биле демнежип, катчып алдывыс.
Кыштаавыста кудук бар. Малывысты ырак эвесте агып чыдар Өөк хемден суггарып турар бис. Чыл төнчүзүнге чедир чырык коштурарын кызыдар бис. Өөм ишти Кур-Чер сумузундан. Ол ам «узун шөлээде», тос айлыг уруувусту азырап турар.
Сиген-ширбиил белеткээр сиген кезер кожуглуг тракторну боттарывыс күжүвүс-биле садып алдывыс. Малчын кижиниң ижи чымыштыг-даа, берге-даа. Кыштың соогу, чайның изии дивейн мал соондан кылаштаар болгай. Малчыннаар сонуургалывыс черле турган. Төлевилелдиң ачызында мал тудар күзел бүткени ол. Ада-ием мал-маган тудуп турган болгаш арга-дуржулгам база бар – деп, Ай-Чүрек Сат ажыл-ижин таныштырды.
Тарлагның аныяк малчыннары кожууннуң өнчүзүнче чээрби бар инекти дамчытканнар. Кожуннуң көдээ ажыл-агый эргелелиниң ажылдакчылары, мал эмчилери кыштагга доктаамал кээп, малдың деңгелин хынап турар.
