Тыва Республиканың бирги чери дээш "Шагаа-2022" байырлалга тураскааткан 18 хар чедир назылыг элээди оолдар аразынга тыва хүреш маргылдаазынга "Тыва" спорт школазының төлээзи, Эрзин чурттуг элээди мөге Айран Ижи шүглүп үнгенин ТР-ниң Спорт яамызы дыңнадып турар.
"Алдар" спорт клувунуң төлээзи Түметей Ширижик үжүүрлешкен. 2021 чылда Наадым байырлалынга тураскааткан хүреш маргылдаазынга Түметей Ширижик шүүп каан, Айран Ижи үжүүрлешкен турганын сагындыраал.
Улуг-Хемден Солаан-Байыр Эрес-оол болгаш Сүт-Хөлден "Тыва" спорт школазының төлээзи Сүлде Донгак үшкү-дөрткү шаңналдыг черлерже кирген.
Бешки-сески шаңналдарны Барыын-Хемчиктен Чимит Күжүгет, Чөөн-Хемчиктен Айслан Самбый-оол, Сүт-Хөлден Доржусамбуу Ондар болгаш Чөөн-Хемчиктен Гендун Монгуш олар тус-тузунда чаалап алганнар.
"Тиилелгеже чүткүл" деп тускай шаңналга Эрзин кожуундан Күдерек Баанай болгаш Тожу кожуундан Батыр Дамдын-оол төлептиг болганнар.
"Чараш арга" деп тускай шаңналды Улуг-Хемден Солаан-Байыр Эрес-оолга тывыскан.
