Бөгүн студентилер Татьяна хүнүн демдеглеп турар. Чалыы назын байырлалының бүдүүзүнде Тываның күрүне университединге ректорнуң стипендиязын алыр мөөрейниң түңнелдерин үндүрген.
Кызылдың башкы колледжиниң үшкү курсчузу Айрат Ооржак шылгарааннарның санынче кирип, ректорунуң стипендиязын алыр эргени чаалап алганын өөредилге чери дыңнаткан.
Айрат Ооржак – Тываның хостуг хүрешке болгаш сумога чыынды командазының кежигүнү. Ол «Наадым-2024» малчыннар байырлалынга тураскааткан 18 харга чедир элээди мөгелер аразынга национал хүреш маргылдаазынга шүүлген. Аңаа шыырак дээн 143 элээди мөге ачыр-дачыр тудушканын сагындыраал.
Стипендия алыкчызының «Студентилерниң спорт төвү» төлевилели Росаныяктарның грантызын чаалап алган.
Айрат чүткүлүдүг, оожум-топтуг, биче сеткилдиг сургуул дээрзин колледжтиң коллективи онзалап демдеглеп, ооң-биле чоргаарланып турарын дыңнаткан.
Студент чылдар чүгле оюн-хөгнүң чылдары эвес, а кижи бүрүзүнүң амыдыралының эң харыысалгалыг чылдары болур. Оларның бот-тускайлаң амыдыралчы чоруу, бурунгаар көрүжү болгаш бедиктерже чүткүлү ынчан көстүп келир.
Елизавета кадын “Москва университедин үндезилээриниң дугайында” Чарлыкка атты январь 25-те салган. Николай I хаанның үезинде Татьяна хүнүн чурттуң бүгү дээди өөредилге черлеринге демдеглээр апарган.
