Айыыл чок чоруктуң лабораториязы Кызыл кожуунда

Часкы дыштанылга үезинде республиканың школачыларынга немелде өөредилге албан черлеринге, уругларның база элээдилерниң спортчу болгаш хөгжүм школаларының, хоорай-суурларның, уругларның база үлегер-майыктың ном саңнарының, культура бажыңнарының, Өг-бүле болгаш уругларга социал дуза төптериниң баазазында 170 хире түр када хостуг үе төптери ажылдап турарын ТР-ниң өөредилге сайыды Елена Хардикова дыңнаткан.

Ол ышкаш «Айыыл чок болгаш шынарлыг автомобиль оруктары» национал төлевилелиниң «Орук шимчээшкининиң айыыл чок чоруу» деп федералдыг төлевилелдиң «Айыыл чок чоруктуң лабораториязы» деп көжүп чоруур комплекс ажылдап турар.

– Лабораторияның апрель, май айларда кожууннарже үнүүшкүннүг кичээлдер планын тургустувус. Дүүн Кызыл кожууннуң школачыларынга «дугуй кырында» лабораторияның тускай мергежилдиглери автохоорайжыгаштың дузазы-биле орукка айыыл чок чоруктуң дүрүмнери-биле таныштырган.

Школачылар практика кырында орук шимчээшкининиң дүрүмнерин шиңгээдип ап, боттарын пассажир, чадаг-тергечи болгаш чадаг кижи ролюнга шенээннер.

Уругларывыстың айыыл чок-чоруу – бирги черде. Бис, улуг улус, ол дугайында утпас ужурлуг бис – деп, сайыт соцчеткилерде бижээн.

Лаборатория эргежок чугула өөредилге-методиктиг дериг-херекселдер-биле дериттинген – светофорлар, оруктар макеттери, чадаг-тергелер, самокаттар, камгалал херекселдерин бараалгадып көргүзер түүлер болгаш медээлиг баннерлер.