Орук шимчээшкининиң дүрүмнерин практиктиг кичээлдерге шиңгээдип алыры чиик дээрзинге Шагаан-Арыг хоорайның 1 дугаар школазының өөреникчилери херек кырында бүзүрээннер.
Ук школага «Айыыл чок чоруктуң лабораториязының» көжүп чоруур комплекизи четкен. Орук шимчээшкининиң айыыл чок чоруунуң күрүне инспекциязының ажылдакчылары болгаш лабораторияның специалистери автохоорайжыгаштың дузазы-биле уругларны орукка айыыл чок чоруктуң дүрүмнери-биле таныштырган. Ол ышкаш уруглар боттарын пассажир, чадаг-тергечи болгаш чадаг кижи ролюнга шенээннер.
– Чадаг-терге канчаар дериттингенил, кандыг камгалал херекселдерин ажыглап болурул, орук шимчээшкининиң өске киржикчилериниң аразынга бодун канчаар алдынарыл дээн айтырыгларывыска уруглар сонуургал болгаш белени-биле харыылап турдулар – деп, Уругларның орук-транспорт кемдээшкининге удур хемчеглерниң регионалдыг курлавыр төвүнүң удуртукучузу Чингис Сарым-оол демдеглээн.
Уруглар чадаг-терге мунарда, «тускай камгалал херекселдерин» практика кырынга кедип хемчээп көргеннер. Ол ышкаш уруглар креслозунуң макединиң дузазы-биле айыыл чок чоруктуң бааның база уругларның быжыглал херекселиниң ажыы кайы хире дээрзин көргүскен. Светофорнуң макединге оруктуң эртер кезээнге айыыл чок кежериниң дүрүмнериниң дугайында таныштырган.
Уругларның онза сонуургалын орук шимчээшкининиң македи хаара туткан. Каш-ла шак дургузунда 150 ажыг өөреникчи орук шимчээшкининиң дүрүмнериниң чаа билиглери-биле чепсегленген.
Тываның «Айыыл чок чорук лабораториязының» көжүп чоруур комплекизи уругларның часкы дыштанылгазының үезинде республиканың школаларынга үнүүшкүннүг кичээлдерни эрттирип турарын сагындыраалы.
