«Айыыл чок чоруктуң лабораториязы» деп көжүп чоруур комплекстиң кызыл-сарыг өңнүг автомашиназы чайгы дыштанылга хонуктарында республиканың кожууннарында өөредилге албан черлерин база уруглар лагерьлерин эргий кезип турарын ТР-ниң Өөредилге яамызы дыңнаткан.
Школачылар төлевилел күүселдези-биле орук шимчээшкиннериниң дүрүмнерин, ол ышкаш ниитилелге болгаш амыдыралга айыыл чок алдынарның эге билиглерин херек кырында шиңгээдирлер. Республиканың уруглар лагерьлеринге кичээлдер бүдүн чай дургузунда болуп эртер.
Эрткен неделяда республиканың немелде өөредилге хөгжүдер төвүнүң Айыыл чок чорук лабораториязы «Металлург», «Орленок», «Чагытай» база «Байлак» лагерьлеринче үнүп, дыштанып турар уругларга орук шимчээшкининиң, хемнер болгаш сугларга алдынарының дүрүмнерин сагындырып, ол ышкаш черлик ыттарның айыылының дугайында чугааларны чоруткан.
Тес-Хем кожуунда «Сайлык», Эрзин кожуунда «Отчугаш», Тожу кожуунда «Родничок» хүндүскү болгаш хоорайдан дашкаар лагерьлерде дыштанып турар 180 уругга ужуражып четкен. Ниитизи-биле 350 уругну хаара туткан Каа-Хем кожууннуң Бүрен-Хем школазының, «Бельбей», Кызыл кожууннуң Ээрбек школазының, «Менгир», Улуг-Хем кожууннуң Арыг-Бажы школазының «Ручеек», «Чодураа» база «Күзел» майгын лагерьлерге көжүп чоруур комплекс ооң мурнунда чораан.
Муң хире оол болгаш уруг лекцияларга, квест база викториналарга, ол ышкаш спортчу туризм хемчеглеринге улуг сонуургал-биле идепкейлиг киришкен. Уругларга орукка айыыл чок чорук дүрүмнерин херек кырында көргүзер дээш тускай шөлчүгешти организастаан. Оолдар «АК-74» автоматты часкаш чыырын, пневматиктиг боодан адырын дыка сонуургаан.
Шак мындыг оюн хевирлиг кичээлдер чүгле өөредиглиг эвес, орукка, сугга база амыдыралга айыыл чок алдынарын хөглүг солун кылдыр көргүзери эң кол. Лагерьде оолдар болгаш уруглар күш-дамырын дадыктырарындан аңгыда, сагыш-сеткилин база быжыглаар. Психолог башкылар коллективти эвилелдээр кичээлдерни, идепкейжи чорукту хевирлээр тренингтерни эрттирген.
«Айыыл чок чоруктуң лабораториязы» деп көжүп чоруур комплекс «Айыыл чок болгаш шынарлыг автомобиль оруктары» национал төлевилелиниң «Орук шимчээшкининиң айыыл чок чоруу» деп федералдыг төлевилелдиң бир угланыышкыны болур.