Россияның хереглекчилерниң эргелерин камгалаар албанның негелдези езугаар, даштыкыдан кээп турар «Нестле» деп чаштар чеминде цереулид деп айыылдыг бүдүмелдиң тывылганы-биле, Тываның хереглел рыногундан ону уштаан. Бо бүдүмел ижин-хырынны аартып, кустурары-биле айыылдыг.
Россия Федерациязының бүгү девискээринде январьның 6-дан тура, ажыглаттынмас деп санаан чамдык барааннарны садып-саарарын хораан. Ол дээрге, 2025 чылдың апрель 15-тен 2025 чылдың ноябрь 27-ге чедир бүдүрген NAN 1 OPTIPRO, NAN 2 OPTIPRO, NAN Supreme, NAN EXPERPRO, лактоза чок NAN, PreNAN, Nestogen Комфорт, Алфаре Амино деп бараан демдектерлиг чаш уруглар чемнери-дир.
Росхереглелхайгааралдың Тывада эргелелиниң даргазы Людмила Салчактың дыңнатканы болза, ажылдакчылар медеглелди алган дораан хоруглуг продукцияның садыг черлеринде барын хынаары-биле үнүүшкүннерни чоруткан. Тываның садыгларда болгаш аптека четкилеринде чаштарга кылган Nestle продукциязын садып турары тодараттынган.
Нестле продукциязы бар ажыл-агый субъектилеринге бараанын саарылгадан дораан уштааш, ону хандырган «Континент» КХН-че эгидип бээрин айыткан. Садып алыкчылар ажыдып каапкан-даа чаштар чемин «Детский мир» садыг четкизиниң кайы-даа садыынга дужааптарын Росхереглелхайгаарал сүмелээн. Бүдүрүкчү болгаш ону садып-саарып турар чер бараанны садып алган улуска ооң өртээн эгидип бээр.
Цереулид дээрге Bacillus cereus бактерияның чамдык штаммнары-биле үнүп турар айыылдыг бүдүмел-дир. Ону изидерге-даа тогбас, хөөй булгадыр база куску келдирер шынарлыг.