Ак-Довурактың үш дугаар школазында чаартылга эгелээн

Тываның Баштыңы Владислав Ховалыгның даалгазы-биле Ак-Довурак школазында улуг септелгени «Чаңгыс демниг Россия» партияның Улусчу программазындан «Аныяктар болгаш уруглар» национал төлевилелче кирип турар «Уругларга бүгү-ле экини» федералдыг төлевилел езугаар кылып турар.

Ак-Довурактың дөрт каът школазынга 40 ажыг чылдар ишти мындыг септелге бир дугаар кылдынып турар болгаш, тудугжуларның кылыр ажылдары хөй. Школада бузар-адырар ажылдар эгелээн, септелге чорудуун ТР-ниң Өөредилге яамызы хайгааралда алган. 700 ажыг өөреникчи болгаш башкылар ынак школазының чаартылгазын манап турар.

Айыыл чок чоруктуң болгаш таарымчалыг байдалдың амгы үениң негелделеринге дүүштүр школаның оран-савазын эде тудуп, амгы үениң өөредилге херекселдери-биле класстарны дериирин хандырарынче угланган чаартылгаже кол кичээнгей салдынган.

Школаның инженер системаларын, даштын чаартыры болгаш иштики шеверлел ажылдары септелге даңзызынче кирген.

Ооң-биле чергелештир школаны амгы үениң эт-севи, компьютер болгаш интерактивтиг техника, лабораторлуг болгаш спортчу дериг-херексел-биле чепсеглеп эгелээн. Бо хонуктарда чаа өөредилге дериг-херекселдериниң болгаш эт-сеп аймааның бирги партиязын школа алган.

Чаа өөредилге чылынга чедир септелге ажылдары доостур ужурлуг. Өөреникчилер амдыызында хоорайның өске өөредилге черлеринче хувааттынган болгаш, школа өөредилге чорудуун ам-даа уламчылавышаан.

Тываның эрге-чагыргазы бо чылын чеди өөредилге объектизин – Ак-Довурактың даг техникумун, Тываның агроүлетпүр техникумунуң ийи дугаар ниити чуртталга бажыңын, Барыын-Хемчик кожууннуң Кызыл-Мажалык суурда «Чечек» уруглар садын, Чеди-Хөл кожууннуң Ак-Тал суурда уруглар садын, Улуг-Хем кожуунда «Чодураа» база Тес-Хем кожуунда «Сайлык» лагерьлерин чаартыр планныг.

Регионнуң «Уругларга бүгү-ле экини», «Профессионалитет», «Өг-бүлеге деткимче» база «Уруглар болгаш аныяктарның өөренир, дыштаныр болгаш кадыкшылын быжыглаарынга байдалдарны тургузары» федералдыг төлевилелдерге киришкенинден өөредилге албан черлерин эде чаартыр ажылдар кылдынган.