Аксы-Барлыкта школаны чаартып турар

Барыын-Хемчик кожууннуң Аксы-Барлык ортумак школазында үндезин септелге чоруп турарын ТР-ниң Өөредилге яамызы дыңнаткан. Өөредилге объектизин сентябрь 1-ге чедир доозар.

– Аксы-Барлык суурда школаның үндезин септелгезин бо чылдың апрель айда кылып эгелээн. Ында кылыр ажылдар хөй, ынчангаш объектини үе-шаанда, хуусаазында, дужаар дээш шупту чергениң удуртукчулары база септелгеде хаара туттунган ажылчыннар кызымаккай ажылдап турар.
Амгы үеде септелге ажылдарының 50 хуузу кылдынган. Чаартынган школаның ажыттынарын суурнуң школачылары база ада-иелер манап турар. Сентябрь 1-де өөредилге чери 110 уругга эжиин ажыдар» – деп, Барыын-Хемчик кожууннуң өөредилге эргелелиниң начальнигиниң хүлээлгезин күүседип турар С.А. Ооржак дыңнаткан.
Барыын-Хемчик кожууннуң Аксы-Барлык суурда «Аныяктар болгаш уруглар» национал төлевилел-биле школада үндезин септелге ажылдары чоруттунуп турарын сагындыраал.
Тывада школа инфратургузуун чаартыр программаны боттандырып эгелээнден бээр үш чыл дургузунда 46 өөредилге албан черин үндезини-биле септээн.