“Алаш” бөлүүнүң 25 чыл ою: хөөмей-сыгыт чаңгыланган

“Туран” сыын ажыл-агыйының девискээринге ажык дээр адаанга делегейде ат-сураа билдингир «Алаш» бөлүүнүң уран чүүлүнүң 25 чыл оюнга тураскааткан хөөмей-сыгыт чаңгыланган «Алаш-фест» дириг хөгжүм фестивалы болуп эрткенин Тыва үндезин культура төвү дыңнаткан.

Ук бөлүктүң тывылган төөгүзү солун. Бөлүктү Тываның улустуң хөөмейжизи, Россия Федерациязының артизи Коңгар-оол Ондар, Кызылдың уран чүүл сургуулдары-биле кады тургускан. Олар чүгле Тыва биле Россияда эвес, даштыкы чурттарже база үнүп, шаңнал-макталдыг черлерни ам-даа ээлеп турар хевээр.

25 чыл тургузунда тыва улустуң аас чогаалынга үндезилеттинген “Алаш” бөлүү чоннуң хүндүткелин болгаш ынакшылын чаалап ап, хөөмейниң база ыры-хөгжүм уран чүүлүнүң хөгжүлдезинге канчаар-даа аажок улуг үлүг-хуузун киирип келген.

Тыва үндезин культура төвү “Алаш” бөлүүнге 25 чыл ою таварыштыр байыр чедирген.