Бөгүн В. Көк-оол аттыг Национал хөгжүм-шии театрынга республиканың аңгы-аңгы булуңнарындан 600 школачы хары угда чалыы армейжилерниң одуруунче кирген.
Байырлыг чыскаалга оолдар болгаш уруглар Россияның болгаш Тываның ыдык ырыларын күүсеткеш, чыылганнарның хей-аъдын улам-на көдүрген. Алды чүс чаа кежигүн чалыы армейжи атка төлептиг болурунуң даңгыраан берген.
ТР-ниң Чазак Даргазының оралакчызының хүлээлгезин күүседип турар Алексей Сазан-оол, Россияның Маадыры Чалым Чүлдүм-оол, 55-ки гвардейжи тускай мото-адыгжы (даг) бригаданың дайынчылары, тускай шериг операциязының хоочуннары болгаш өскелер-даа байырлыг хемчегге киришкен.
Алексей Сазан-оол Тываның Баштыңы Владислав Ховалыгның мурнундан база бодунуң өмүнээзинден келир үениң чалыы армейжилеринге байыр чедирген. «Чалыы армия» – чүгле ада-чуртчу чорук эвес, а эрес-дидим болгаш шынчы чоруктуң, найыралдың школазы-дыр. Силер чурттуң патриоттары – бистиң чоргааралывыс силер» – деп, ол чугаалаан.
“Чалыы армия” хөй-ниити шимчээшкининиң регионалдыг штавының удуртукчузу Айдың Шивидектиң дыңнатканы-биле алырга, республиканың школачылары чалыы армейжилер шимчээшкинин дыка сонуургап турар.
– Сезен чыл бурунгаар 206 тыва эки турачы фронтуже аъттаныпкан. Бо ада-чуртчу хемчегни оларга тураскаадып эрттирип турарывыс бо. Келир чылын «Чалыы армия» шериг-ада-чуртчу хөй-ниити шимчээшкининиң регионда салбыры тургустунганындан бээр 10 чылын демдеглээр. Ынчан муң өөреникчини шимчээшкинивисче киирип, шылгарааннарны шаңнап-мактаары көрдүнген – деп, Айдын Шивидек дыңнаткан.
Байырлыг чыскаалга шылгараан чалыы армейжилерге хөрек демдектерин тывыскан. Оларның аразында Кызылда президентиниң кадет училищезиниң кижизиттирикчилери база бар. Никита Кузнецов чалыы армейжилер одуруунче 5-ки класска өөренип тургаш кирген. «Чалыы армейжи шылгарал» деп хөрек демдээн алганымга дыка өөрүп тур мен. Мээң-биле кады бо шаңналды училищеден дөрт уруг база алды. Келир чылын дооскаш, улаштыр Рязаньның агаар-десант училищезинче өөренип кирер мен – деп, кадет өөрүшкүзү-биле үлешкен.
Бо хүнде шериг-ада-чуртчу хөй-ниити шимчээшкининде 8000 ажыг чалыы армейжи бактаап турар.