Улуг-Хемниң херээженнер чөвүлели база Эйлиг-Хемниң культура одааның ажылдакчылары 50 хардан өрү назылыг херээжен улус аразынга «Алдын кадын-2026» деп мөөрейни эрттиргенин чагырга чери дыңнаткан.
Сумунуң чагырга даргазы Херел Сувак «Тыва кызы» деп ырызы-биле мөөрейни ажыдып, киржикчилерге тиилелгени күзээн.
Бүгү делегейниң херээженнер хүнүнге тураскааткан мөөрейге Ийи-Тал, Хайыракан, Чааты, Торгалыг, Арыскан, Арыг-Үзүү, Иштии-Хем база Эйлиг-Хемден сагынгыр-тывынгыр, салым-чаяанныг, шевер болгаш идепкейжи кадыннар киришкен. Олар боттарын шүлүктеп тургаш чечен-мерген таныштырып, чогаадыкчы чоруун база уран салым-чаяанын көргүзүп, мөөрейлешкен.
«Алдын кадын-2026» атка Хайыракандан 58 харлыг спортчу, уран-шевер Чинчи Шойдуң төлептиг болуп, бирги черни чаалап алган. Шаңналы – алдын сыргалар, үш муң рубль. Тускай шериг операциязының киржикчизи Сүрен Сувак деткикчилээн.
Чаатыдан Чиңгисмаа Таспан-оол уран салым-чаяанын, аажы-чаңының топтуун, чечен-мергенин көргүзүп, ийиги черни чаалап алган. Улуг-Хемниң «Мөңгүн кадыны» болган. Тиилекчиге мөңгүн сыргалар, билзекти, деткикчилер Менди Делег биле Аян Маадырдан 3500 рубльди тывыскан.
Иштии-Хемден Елена Балчынмай «Хүлер кадын» болган. Шаңналы мөңгүн сыргалар, билзек (деткикчи Юля Оспакай). Бодун солун, оюн-баштак, дидим кылдыр көргүскеш, «Чечен-мерген кадын» деп шаңналга база төлептиг болган. Арыскандан Ш.Ч. Донгактың өг-бүлези үшкү черни ээлээн кадынга өртектиг белекти сөңнээн.
Арыскандан Роляна Конгар «Ээлгир самчы кадын», Ийи-Талдан Аида Дартай-оол «Шевер кадын», Арыг-Үзүүнден Саяна Түлүш «Кайгамчыктыг чараш кадын», Торгалыгдан Яна Шириин-оол «Уран-талантылыг кадын», Эйлиг-Хемден Лилия Дырыш-оол «Угаан-сарыылдыг кадын» шаңналдарга төлептиг болган. Лилия Дырыш-оол көрүкчүлерниң үнелелин чаалап ап, мөңгүн сыргалар, билзек акша-биле шаңнаткан (деткикчи Юля Оспакай). Тиилекчи кадыннарга акша шаңналдарын тывыскан.
Ыраажылар Херел Сувак, Долита Уйнук-оол, Рада Быштак-оол, бичии уруглар Камила, Кимаа база Торгалыгдан Игорь Шивит ыры-хөгжүмү-биле мөөрейни каастап, залда херээжен чонга чараш ырыларны бараалгаткан.
Эйлиг-Хемниң школа, уруглар сады, эмнелге, чагырга коллективтери база херээженнер чөвүлели акша шаңналдарын деткикчилээн. Кадыннарга эш-өөрү, коллективи, чоок кижилери чечектерни сунуп, белек-селээн сөңнеп, байыр чедирген.