Алгының эдижи идээзинде

Хандагайты суурнуң Монгуш Сылдыс кудумчузунуң арбанынга Россияда чарлаттынган Өг-бүле чылынга тураскааткан «Алгының эдижи идээзинде» деп кичээл болуп эрткенин чагырга чери дыңнаткан.

Шаанда тыва херээжен улустуң алгы-кеш эттээринге дуржулгазы улуг чораан. Алгы-кешти эки, шын кургадып, эттеп алырындан ооң эдилели хамааржыр. Эки эттеп каан алгының эдилели үр болур.

Малдың алгы-кежин октаарын амгы үеде шеглээн, чүге дизе ону эттээш, идик-хеп дээш өске-даа эт-сеп аймаан кылып ап турар. Шаанда идик-хепти алгы-кештен, пөстерден быжып, даараары өг-бүлениң кыс ээзиниң кылып билир ужурлуг ажылы, хүлээлгези турган.

Өөредилглиг кичээлдиң киржикчилеринге Хандагайты сумузунуң херээженнер чөвүлелиниң даргазы Людмила Ховалыг бодунуң өөнге хөй ажы-төлдүг, үлегерлиг өг-бүлелерге аяк-шайын кудуп хүндүлеп, далган-тараазын, ак чемин делгеп салбышаан, бодунуң ам бо үеде кылып турары ажылын (хураганнар кештерин эки шынарлыг эттээриниң дугайында) бөдүүнү-биле көргүзүп, тайылбырлаан.

Кичээлге келген киржикчилер боттарынга дыка хөй ажыктыг чүүлдерни билип алганы дээш четтиргенин илереткен.