Шагаан-Арыгның чурттакчызы Алимаа Ооржак нугуушкун салонун ажыдып алганын чагырга чери дыңнаткан.
Эгелеп чоруур сайгарлыкчы социал керээге үндезилээн күрүне деткимчези-биле ажылдаарынга херек дериг-херекселди садып алган. Оорга-мойну аарып чоруур улус, ылаңгыя олурар ажылдыг кижилер нугуушкун салону ажыттынганынга өөрүп, күзелдии-биле кээп турар.
Алимаа Ооржак келген кижиниң бир дугаарында ханының базыышкынын хынааш, кезиишкин эрткен-эртпээнин, сынып турган сөөктерин быжыглаан демир бар-чогун ылавылап айтырып алыр.
Амгы үении-биле дериттинген нугуушкун кылыр электри креслода соталыг телефон октаар, телефон көөрүнге эптиг кылдыр, карак дужунга, салып алыр херексел бар. Аңаа 20 минутадан 30 минутага чедир олуртур. Креслога олурган кижини бажындан эгелээш таваңгайынга чедир нугуур.
Күрүне деткимчезиниң алыкчызы мага-ботту, оорганы, моюнну, башты, чушкууну, хол-бутту нугуп турар. Ачы-дуза чедирилгезиниң өртек-үнези таарымчалыг.
Алимаа Ооржак кожууннуң төп эмнелгезинге эмчи сестразы болуп 10 чыл ажылдаан. Ол бодап чораан күзелин күрүне деткимчезиниң ачызында боттандырган.
Улуг-Хем кожуунда күрүне деткимчези-биле бодун ажыл-биле хандыртынган улустуң хөй кезии аныяктар. Олар баш таарар, даараныр, идик септээр, каңнакчы ажылдарын чорудар, машина-балгат септээр, эът кылыгларын бүдүрер, хлеб кылыглары быжырар черлер, чараштаныр салоннар, кафелер дээш оон-даа өске ачы-дуза чедирер биче бүдүрүлгелерни ажыткан.