Амбын-Нояннар шөлүнге шөйген быштак, саржаг, чөкпек кылып…

Амбын-Нояннар шөлүнге эрткен көдээ ажыл-агый ярмарказынга тус черниң чурттакчылары аъш-чем аймаан садып-сайгарарындан аңгыда, национал ак чем кылып белеткээрин база өөреткен.

Ак-Эриктен Айлаңмаа Ланаа саржаг, өл ааржы болгаш чөкпек, Чыргаландыдан Зоя Сондуймаа изюм холумактыг хайлымак, О-Шынаадан Саяна Ойдуп шөйген быштак кылырының, Самагалдайдан Байлак Соян мөөгүлер дузаарының мастер-класстарын көргүскен.

Тес-хемчилер артыкшылдыг аъш-чемин акша-төгерикке чедирип ап, арга-дуржулгазы-биле солушканнар. Садып алыкчылар баартактарда таарымчалыг өртектерге делгээн ногаа, эът, сүт аймаан дораан арыдыпкан.

Кожууннуң Чонну ажылга хаара тудар төвүнүң ажылдакчылары, херээженнер чөвүлелиниң кежигүннери, көдээ ажыл-агый эргелелиниң төлээлери онзагай ярмарканы эрттиргени ол.