Чааты сумузундан Чодураа Ондар пицца быжырар, суши, роллдар кылыр база булочка кылыгларын быжырар биче бүдүрүлгени ажыдып алганын Улуг-хемниң Чонну ажылга хаара тудар төптүң даргазы Челээш Ховалыг дыңнаткан.
Эгелеп чоруур сайгарлыкчы социал керээге үндезилээн күрүне деткимчези-биле пицца быжырар суугу, картофель, эът быжырар херекселди садып алган. Ам ол аңгы-аңгы чемчилиг пиццаны, суши, роллдарны, наггетсы биле картофель-фрини белеткеп, чаңгыс чер чурттугларын өөртүп турар. Ол чаатыжыларга баш бурунгаар чемни чагыткаш, болу бээрге, ап алыр арганы база тургускан.
Чодураа Ондар пиццаны изии-биле чедирип берип турар. Суму чагыргазы ажыл-биле бот-хандыртынган сайгарлыкчының ажыл-херээ шуудап, чагыглары үзүлбес болурун күзээн.
Кожуунда күрүне программазының ачызында ажыл-биле бот-хандыртынган улустуң саны чылдан чылче көвүдеп турарын чагырга чери демдеглээн.