Аныяк бедик мергежилдиглер белеткелинге ужуп үнер шөлчүгеш

Башкы болгаш дагдыныкчы чылының хаап турар хемчеглериниң чорудуу-биле Ак-Довурак хоорайда «Аныяк профессионалдар белеткелинге ужуп үнер чер» деп шөлчүгешти организастаанын ТР-ниң Өөредилге яамызы дыңнаткан.

Ук хемчегге ажыктыг казымалдарны байлакшыдар база улаштыр болбаазырадыр талазы-биле темаларны шинчилээр ажык кичээлдер болгаш мастер-класстарны эрттирген. Башкыларга мастер-класстарны эрттиреринге техникумнуң сургуулдары дузалашкан.

«Ажыктыг казымалдар байлакшыдары» лабораторияда бүдүрүлге өөредилгезиниң мастери Аяна Ондар ийиги курстуң сургуулу Орлан Куулар-биле кады даг-байлакшыдар комбинатта ажыктыг казымалдар-биле чада аайы-биле ажылды шинчилээрин тодаргайы-биле көргүскен мастер-классты эрттирген.

Сургуулдар өөредилге чорудуунуң үезинде бистиң республиканың минералдыг чиг эт баазазы-биле танышкан болгаш, республикада полиметаллдыг рудаларның курлавырлары колдап турарын, оларны байлакшытканындан мөңгүннү, алдынны, коргулчунну, цинкти болгаш өске казымал кезектерни үндүрүп турарын билир дээрзин сагындыраалыңар. Техникумда ажыктыг казымалдар-биле ажыл талазы-биле мастерская биле лаборатория дериттинген.