Аныяк чогаалчы чаа номун дазылга бажыңынга белекке берген

Тываның А. С. Пушкин аттыг национал ном саңының абонемент килдизиниң ажылдакчылары Кызылдың назылап-кыраан болгаш кадыкшылыныӊ байдалы-биле харык-шинээ кызыгаарлыг хамаатыларның дазылга бажыңынга аныяк чогаалчы Саргылана Саая-биле солун ужуражылганы эрттиргенин ном саңы дыңнаткан.

Саргылана Саая чүгле чогаалчы эвес, ол «Орай күзел» деп тыва кинонуң кол режиссеру. Амгы үеде кады чурттаан эжиниң быжыг чөлеңгиижи, үш ажы-төлүн кижизидип, өстүрүп чоруур үлегерлиг ава.

Хоочуннар аалчызының допчу намдарын, чогаадыкчы ажыл-ижин аажок сонуургап, Турцияга өөренип чораанын кичээнгейлиг дыңнап, хөй солун айтырыгларны салып, аныяк авторга чогаал делегейинче ам-даа ханы шымныгып кирерин күзээннер.

Аныяк чогаалчының «Орай күзел» деп тыва кинозунуң үзүндүзү ужуражылганы каастаан. Хоочуннар кинону улуг сонуургал-биле көргеннер.

Ужуражылга чылыг сактыышкын болуп артып каары-биле, Саргылана Саая «Чогаалымдан төөгүп берейн» деп чаа номун хоочуннар бажыңынга белекке берген. Ук ном авторнуң баштайгы ному.

«Чогаалымдан төөгүп берейн» деп номда «Бүтпээн келин», «Коронавирус халдава», «Риэлтор Хорагай», «Бомж Чочагай», «Он муң акша» дээш оон-даа өске солун чечен чугаалар база «Сургуулдарның ужуралдары» деп кыска тоожу кирип турар.