Аныяк каңнакчы – Ээр-Хавактан Ачыты Хандармаа

Бай-Тайга кожууннуң Хемчик сумузунга Ада-чурт камгалакчыларының хүнүнге турскааткан «Аныяк каңнакчы» деп республика чергелиг ус-шеверлер мөөрейи болуп эрткенин чагырга чери дыңнаткан.

Ус-шеверлер мөөрейинге аңгы-аңгы сумулардан ниитизи-биле 11 каңнакчы киришкен. Бай-Тайга кожууннуң чагырга даргазы Чингис Салчак биле кожуун баштыңы Роберт Аракчаа каңнакчыларга чедиишкиннерни күзеп, байыр чедирген.

Мөөрей үезинде Тыва Республиканың Улустуң мастери, Россияның чурукчулар эвилелинин кежигүнү Владимир Шомбулович Салчак демирни кадырарынга болгаш тыва бижекти кылыр аргаларынга местер-классты эрттирген.

Киржикчилер ийи хонуктуң дургузунда улуг азы бичии бижектер кылырынга күжүн шенешкеннер. Ук мөөрейниң кол негелделери: улуг азы бичии бижектер кылыр, кылган бижектиң хевирин болгаш аңгы-аңгы аргалар-биле кадырганын база сывын канчаар ажыглаанын көөр.

Мөөрейниң кол шииткекчилери: Тыва Республиканың Улустуң мастери Владимир Салчак, ТР-ниң даш чонукчуларының эвилелиниң даргазы Ай-Демир Шыырап, эвилелдиң кежигүнү Салчак Николай, Тываның “кара дарганы” Виктор Ондар, Тываның В.Көк-оол аттыг Национал хөгжүм-шии театрының улуг чурукчузу Өлчей Санчыт-оол, Хертек Тойбухаа аттыг Тээлиниң чурулга школазының директору Айдын Куржап.

Мөөрейниң түңнелдери-биле бирги черни Ээр-Хавактан Ачыты Хандармаа, ийиги черни Хемчиктен Очур Мерген, үшкү черни Тээлиден Шолбан Салчак олар чаалап алган.
Республикага бир дугаар болуп эрткен бо онзагай мөөрей бедик деңнелге эрткен.