Аныяк малчынның чырык адынга тураскааткан бөмбүктүг хоккей маргылдаазы

Улуг-Хем кожууннуң Ийи-Тал сумузунга аныяк малчын Таймир Шалганның чырык адынга тураскааткан республика чергелиг бөмбүктүг хоккей маргылдаазы болуп эрткенин чагырга чери дыңнаткан.

Маргылдааның байырлыг ажыдыышкынынга сумунуң бөмбүктүг хоккейге «Эң-не эки халдакчы» аттың эдилекчизи, аныяк, эрес-кежээ малчыны чораан Таймир Шалганның авазы оглунуң дугайында чылыг-чымчак сактыышкынны кылып, спортчуларга тиилелгени күзээн.

Бөмбүктүг хоккейге 14 команда киржип, солун оюнун көргүскен. Бирги черни Бай-Тайга кожууннуң Шуй сумузунуң командазы (30000 рубль) бүзүрелдии-биле чаалап алган. Ийги черге Бай-Тайга кожууннуң Кызыл-Даг сумузунуң командазы (20000 рубль) төлептиг болган. Үшкү-дөрткү черлерни «Ийи-Тал-1» биле «Ийи-Тал-2» командалары (10000-10000 рубль) үлешкен.

Ийи-Талдың аграр школа-интернадының өөреникчилериниң командазынга деткимче кылдыр 10000 рубльди тывыскан. Чараш оюнну көргүскен «Эң-не эки халдакчы» – Шуй командазындан Шаанак Иргит, «Эң-не эки камгалакчы» – Кызыл-Даг командазындан Чылгычы Ооржак, «Эң-не эки дозукчу» – Ийи-Тал командазындан Аюр Иргит олар тускай аттарга төлептиг болуп, кубоктар болгаш 3000 рубльдиң шаңналдарын алганнар.

«Эң-не улуг назылыг ойнакчы» – Кызыл-Даг командазындан Марат Тойбухаа, «Эң-не бичии ойнакчы» – Ийи-Талдан Субудай Аракчаа, «Эң-не эки аарыкчы» – Альберт Хертек болган, бо ойнакчыларга болгаш аарыкчыга тускай белектерни тывыскан.